Vastelaovesvereniging “de Aester Sjaelen Uul” plaatsdje in 2000 eine zoagenaamdje milleniumzuul op ‘t “Vastelaovesplein”, oppe hook vanne Sjoalstraot enne Kirkstraot, in Pej. 

Op deze betónne zuul zeen 53 bronze plaetjes aangebrach. Op elk plaetje stuitj: Naam awd Prinse - awd Vorste – awd Presidente en hun regeerperiode.Awd Väörzitters en de periode van väörzittersjap. 

Reje óm te kómme toet de oprichting van deze millennium waas ’t feit det w’r es vastelaovesvereniging de aesters en aesterlingskes oet ’t Prinseriek Pej ein blievendj aandènke wille aanbeje, óm letterlik stil te blieve staon, det in de väörige ieëw en waal in ’t jaor 1953 de Pejjer vastelaovesvereniging is opgerich. 

Neet allein de oprichting is gedènkwaardig. Auch ’t in standj haoje en de bandj mitte minse van Pej, Hènge, Slek en Sjaelberg is vanaaf 1953 van groat belang gewaes. Die make oeteindelik de vastelaovendj. 

Det m’n den automaties stil blif staon bie de historie van de Echter vastelaovendj en de Pejjer vastelaovesvereniging weurdj dudelik oet ènkele opsomminge. 

Väör de 2^e waereldoorlog hej Ech ein aktieve carnavalsvereniging “de Aester” mit leje oet de diverse Echter kerne. Optochte begóste oppe Pepinusbrök en trókke door ’t Pejjer en Echter landj. Door ’t óntbraeke van de gooj kandidate waas ’t Bair Smeets dae es Prins Bair I ein aantal jaore haetj geregeerdj äöver ’t Aester riek. Inne loup der jaore kreeg hae de naam: Bair dezelfdje. Deze vrunjtelikke persuuenlikheid waas erg geleef in Ech. 

Nao de oorlog koom de vereniging mer lestig op gang. Ech waas väöral bezig mit puimrume. Op zóndig 3 mieërt 1946 ging de raod van èllef richting Slek óm de regerende Prins Huib I aaf te haole. De offisjeel vastelaovesgezèt waas ein van de visitekaertjes vanne vereniging. Inne oetgave van 1946 stóng al te laeze: Verwachtj weurdj ein fusie tösse E.V.V. en R.I.O.S. 31. Dees nuuj 2^e klasse club zal den heite V.G.W.V. “Väöl Gestechel, Weinig Voetbal”.  

Jan Simons woor in 1947 de ieëste Pejjer Prins bie de Aester in Ech. Fluit- en Trómmelkorps Juliana fungeerdje es liefgarde väör Prins Jan I. Aan ’t begin van ’t vastelaovessezoen 1951 / 52 veel ’t dook. De Aester waas vleugellaam. 

In Pej vónj m’n ’t hieël erg det d’r gein georganiseerdje vastelaovesviering woor. Aan ’t ènj van 1952, begin 53 wore d’r planne óm ein eige Prinseriek te beginne. Niks zoe de inwoners en de väöle vereniginge van Pej kènne stoppe, behalve modernatuur. Begin 1953 zeen d’r belangrieker zake es vastelaovesviere. Eine geweldige stórm mit orkaankrach is mede de oorzaak van de watersnoadramp in Zieëlandj en kerne dao óm haer. Auch de burgers van de gemèndje Ech zeen solidair en organisere aksies väör hulp aanne slachoffers. Zoa auch de Aesters en Aesterlinkskes oet Pej. 

In Ech stook eine angere stórm op. ’T woor ’t gezag t’r oare gekómme det m’n in Pej ein eige Prinseriek wól oetrope. Dit sjoot hun in ’t verkieërdje kaelsgaat. Dit kós en moogdje neet gebäöre. 

‘T “groate” Ech zoe geine georganiseerdje vastelaovendj höbbe, mer ‘t “kleine”Pej zoe waal in staot zeen óm ein nuuj vastelaovesvereniging op te richte. M’n zoe hiej waal èns ein stekske / scepter väör staeke. Alle mäögelikke diplomatieke brónne waerdje aangebaordj óm d’r väör te zörge det dees planne, planne zoewe blieve. De burgemeister vónj det d’r ieës óngerzoch mós waere of d’r toch weer mäögelikheje wore óm te kómme toet ein groate vastelaovesvereniging. Sjlum vastelaovesvierders oet Pej konkludeerdje hie oet det ’t neet “verbaoje”woor óm ein Republiek oet te rope mit aan ’t hoof eine President dae waerdje biejgestange door ein gek Ministerie.

Dit hoagstendje van politieke diplomasie waerdje gesjmeedj in ’t kefee van Wullem Vrehen aanne Riekswaeg. Dao waerdje ein algemein vergadering belag in Hotel Frohe. De röstendje c.v. “De Aester” oet Ech waas auch oetgenuuedj, mer koom neet opdage. Oet de fanfaar waerdje ein Hofkapel gevormdj. Kepelmeister woor Harie Aben (De Meister). ’T Plein väör kefee Schulpen (noe Brandpunt) waerdje ómgeduiptj toet Republieks plein. Harie Aben waerdje auch nag gekaoze toet väörzitter. Dit bleef hae toet 1986. Jan Poell waerdje de 1^e spraekbuus (1953/62). De ieëste Pejjer sjlager waerdje gekomponeerdj door eine Pejjer groatheid op meziekgebied, Jan (Sjang) Cuypers. De teks woor van Jan Poell. 

Waat Bill Clinton toet op vandaag neet gelök is, lökdje waal 2 Pejjer jónges: Jan Simons en Sjaak Turlings. Allebei zeen ze namelik eine kieër Prins en President gewaes. 

Dré Bongaerts waerdje in fibberwarie 1960 oetgerope es Prins Dre I.In ’t vastelaovessezoen 1960 vónj väör de ieëste kieër ein släöteläöverdrach plaats op ’t gemèndjehoes van Ech. Auch de her-opgerichdje c.v. De Aester waas hie bie aanwezig. Door ’t äöverlieje van Pastoar R. Lebens in Pej waerdje begin mieërt 1960 de Prinseresepsie en de optoch aafgelas. In 1961 woor Dre weer Prins. 

Prins Harry I Palmen (1969) dreigdje op ziene Prinsewage in te snieje. 

Prins Jo II Heythuysen waas in 1971 de ieëste getrouwdje Prins. Auch waerdje d’r väör de ieëste kieër ein bezeuk gebrach aan de Patriciussjoal. Det waas ’t begin van ’t sjoalebezeuk aan alle sjoale in ’t Prinseriek Pej. 

In 1983 waerdje väör de ieëste kieër de Pejjer Kènjerpaerskäöring georganiseerdj. Auch vónj d’r ein vorstelikke wisseling plaats. Jac Verheyen, bienao 22 jaor vors (1962/83), droog dees taak äöver aan Thei Golsteyn (1983/94). Peter Kleijweg vervöltj noe dees taak al vanaaf 1994/95. 

Vanaaf 1986 woor Thei Hanssen väörzitter. Dae goof de hamer in 1992 äöver aan Thei Hilgers. In 1996 waerdje Jack Janssen ziene opvolger. 

Prins Jo III Thoolen hej in 1990 de “primeur” det de optoch waerdje aafgelas in verbandj mit eine echte stórm. In plaats van eine bóntje vastelaovesstórm. 

Auch Prins Wil III hej de pech det de optoch in 1991 waerdje aafgelas. Dit woor in verbandj mit de Golfoorlog. Ein jaor later moogdje hae op herhaling. 

November 1991 waerdje in ’t riek van De Aester in Ech ein Pejjer ambassade in gebroek genómme. Har Boumans waerdje beneumdj toet ambassadeur. 

Al 50 jaor langk is “De Aester Sjaelen Uul”aktief óm de georganiseerdje vastelaovendj in ’t Prinseriek Pej inhoud te gaeve en wo ’t nuuedig is, bie te sture. Det de vereniging in staot is gewaes óm gemekkelik de 21^e ieëw bönne te stappe is väör ein groat gedeilte auch te danke aan de awd Presidente, Prinse, Vorste, Väörzitters en de inwoners van ’t Prinseriek Pej. 

Es dank van ein vereniging die es regel haetj: ein vereniging die neet ómkiktj nao ’t verleje haetj auch gein toekoms, is deze milleniumzuul in ’t jaor 2000 aangebaoje aanne inwoners van ’t Prinsriek Pej. 

Teks: Ton Tonnaer